Ish-deputeti Salianji ka reaguar për vendimin e dhënë nga Prokuroria për çështjen ‘Babale’. Ai u shpreh për mediat se sulmet janë tërësisht politike dhe Prokuroria u bë pjesë me llumin.
“Nuk i druhem fare. E kam thënë në fillim. Shpesh në gjykatë jam bërë si ju, korrespondent si ju. Janë sulme tërësisht politike, nuk pati fakt prove të re. Pati vetëm një devijim. Prokuroria në këtë rast bëhet pjesë me llumin. Prokuroria lexoi fiks atë që tha kryeministri e avokati i Xhafajt.
Edhe sot pala e Xhafajt kishte të njëjtin qëndrim. Prokuroria politike, nuk mori asnjë provë nga ato që kemi dorëzuar. Sot nuk u kërkua dënimi im, ai është kërkuar që kur kam bërë publike çështjen. Askush nuk do ia dalë as të më mposhtë, as të më frikësojë apo të izolojë”, u shpreh Salianji.
Pranverën e 2018-ës, PD botoi 2 audioregjistrime, përmes së cilave supozonte se vëllai i ministrit të Brendshëm aso kohe, Fatmir Xhafaj, Agroni ishte i përfshirë në trafikimin e lëndëve narkotike. E tërë çështja u emërua “Babalja”, pasi dëshmitari X i Partisë Demokratike, i cili ishte i përfshirë në audioregjistrime, thirrej në to me pseudonimin Babale.
Krimet e Rënda lëshuan urdhër-arreste për protagonistët e audiopërgjimit, Albert Veliu, i njohur ndryshe me nofkën “Babalja” dhe kunatin e tij, Fredi Alizoti. Nga ekspertiza që i është bërë kampionit të zërit, ai që dëgjohet në audio nuk është i Agron Xhafajt, por i Alizotit, i cili pranonte se kishte imituar zërin e vëllait të ministrit, pasi iu ishin premtuar 200 mijë euro nga deputeti me mbiemrin Salianji.
