Është zhvilluar ditën e sotme seanca e radhës gjyqësore për çështjen e “Babales”, kundër ish-deputetit demokrat, Ervin Salianji.
Mësohet se gjatë seancës avokati Ledio Braho ka kërkuar që Salianji të shpallet i pafajshëm. Ndërsa ish-deputeti ka kërkuar nga Prokuroria të rishikojë provat, të cilat sipas tij janë shmangur që ti japin një tjetër rrjedhë hetimit.
“Nëse do të doja të bëja një konspiracion kaq te madh do ta bëja me vëllanë e kryeministrit, jo me vëllain e ministrit të Brendshëm. Të rishihen provat që janë shmangur nga prokuroria për t’i dhënë një tjetër rrjedhë hetimit. Audioregjistrimi është i vërtetë. Prokuroria është nisur nga premisa që kam bërë unë lidhjen mes Olldashit dhe Veliut, por tabulatet provojnë që më ka vënë Olldashi në kontakt me Veliun.
Prokuroria i referohet në mënyrë të qëllimtë vetëm dëshmisë së Alizotit, duke mos marrë parasysh komunikimet e Alizotit me zyrtarë të lartë të policisë. Në këto përgjime del qartë që po paguhej për dëshmi të rreme.
Një provë tjetër e pa kundërshtueshme është pavërtetësia e thënieve të Alizotit, që thotë se direkt pas regjistrimet janë nisur në Tiranë. Qelizat telefonike tregojnë qartë se nga 13 janari 2018 deri në 31 janar 2018 Alizoti nuk ka qenë në Tiranë. Ne e kemi disponuar materialin audio në fund të tetorit dhe jo në janar siç thotë Alizoti”, tha ai.
