Deputeti i Partisë Demokratike, Ervin Salianji, ka zhvilluar një interpelancë me Ministrin e Brendshëm, Bledi Çuçi për situatën kriminale. Nga foltorja e Kuvendit, Salianji e pyeti ministrin se ku ndodhet Talo Çela, i cili është një ndër personat më të kërkuar në vend. Ndër të tjera, ai tha se ish-drejtori Gledis Nano u hoq vetëm se ka pasur lidhje me SHBA-në.
“Policia e Shtetit matet me objektiva konkretë. Të ka thënë ish-Drejtori jot i Përgjithshëm, që për operacionin “Plumbi i Artë” ka konfirmuar se është dekonspiruar dhe nga 32 persona, ju arritët të kapnit 18 persona. Ju kanë ikur personat me rekordet më të tmerrshme. Di sot gjë ku e ke Talo Çelën? Nuk mund të të themi dot gjë që kur “Daily Mail” pavarësisht se e kemi ruajtur etikën se është rrjedhje nga hakerimi, por kur “Daily Mail” di që ai qarkullon në mes të qytetit, policia ka informacion dhe nuk ka asnjë veprim. I nxirrni policët nga dy turne për t’i mbajtur kot nëpër postoblloqe, kjo duket që nuk ka vullnet. Ku e keni Suel Çelën? Di gjë ku ndodhet sot? Po Fatos Goga, Florenc Çapja, Kamer Meja, Ervis Martinaj që nuk jepni dot përgjigje sot, gjallë a vdekur lëre më ta kërkoni?! Ndërkohë që ju e dini dhe po u’a them këtu atë që qarkullon nën zë në të gjithë drejtuesit e policisë. Pesë minuta para se të shkonte në hotel, Policia e Shtetit e keni lajmëruar për t’u larguar sepse keni pasur tjetër plan. Eljo Birti, Festim Qoli, Alket Xhixha, Aleks Çela? Vetëm në një operacion i ke këta. Ish-Drejtori i Përgjithshëm i Policisë thotë ka rrjedhur informacioni. Ka njeri përgjegjësi këtu? E ka ai tjetri. E kuptoj unë këtë që Drejtori i Përgjithshëm i Policisë se të kam marrë shifrat, dhe prandaj të kam pyetur cili është objektivi. Ju e keni hequr vetëm se ka pasur lidhje me SHBA. Këto të tjerat janë përralla”, u shpreh Salianji.
