Ylli i nënkomisarit Saimir Hoxha është vendosur në memorialin para Ministrisë së Brendshme, bashkë me 224 dëshmorë të tjerë të policisë. Në fjalën e tij të shkurtër, për shkak edhe të reshjeve të shiut, kryeministri Rama tha se fëmijët e Dëshmorit të Atdheut, nuk do jenë kurrë vetëm. Kreu i qeverisë ka premtuar do të përkujdesen për ta deri kur të arrijnë moshën e pjekurisë.
Këshilli i Ministrave ka vendosur dhënien e një ndihme prej 50 milionë lekësh për familjen e efektivit të vrarë në Lezhë, Saimir Hoxha. Sipas vendimit i cili është miratuar nga qeveria, ndihma prej 5 milionë lekësh (të reja) do të përballohet nga fondi rezervë i buxhetit të shtetit. Dje Rama deklaroi se përveç ndihmës financiare nga shteti, dy fëmijët e mitur që Saimir Hoxha la pas, do të marrin edhe 170% të pagës së babait të tyre deri kur të mbushin moshën madhore.
“Sot ne jemi këtu për të krijuar ceremoninë e vendosjes së yllit në murin e kujtesës së Policisë së Shtetit, pranë yjeve të gjithë dëshmorëve të trupave tona të rendit e sigurisë në harkun e këtyre viteve.
Është një kohë e gjatë qysh se është vendosur ylli i mëparshëm, dhe në një kuptim është lehtësim, që në gjithë morinë e atyre yjeve në atë mur, në këto vite, numri i rasteve tragjike është më pak se gishtat e një dore. Nga ana tjetër statistikat s’kanë rëndësi, sepse një jetë e vetme vlen sa gjithë jetët kur ajo humbet.
Nuk dua të zgjatem se besoj që ky shi që po bie rrëmbyeshëm i thotë më mirë se sa të gjitha fjalët dhe ndjenjat tona.
Dua të them se sidoqoftë ndjej një lehtësim kur mendoj se fëmijët e dëshmorit nuk do të jenë vetëm. Ne do të përkujdesemi për ta siç kemi nisur për familjet e tij deri kur të arrijnë moshën e pjekurisë dhe të dalin me këmbët e tyre në jetë.
170% e pagës për fëmijët nuk thotë asgjë në raport me humbjet, natyrisht që as ato 50 mijë lekë nuk thonë asgjë, por sidoqoftë është një lehtësim të mendosh se fëmijët do të jenë të shoqëruar përdore jo vetëm nga nëna, gjyshërit, por dhe nga shteti, nuk do i mungojë asgjë, njësoj sikur babai të ishte në jetë. Përveç mungesës së tij që askush nuk e zëvendëson dot. Lavdi dëshmorëve të atdheut që sot iu bashkohet dhe ylli i Saimirit”.
