Sot u qëllua për vdekje 35-vjeçari Albi Bashaliu. Viktima rezulton të jetë i arrestuar në vitin 2017, pasi akuzohej se për motive të dobëta ka qëlluar me armë zjarri në drejtim të dy personave. Albi Bashaliu, në atë kohë qëlloi me automatik në drejtim të shtetasve V.SH, 57 vjeç dhe A.B, 38 vjeç, banues në Peqin. Këta dy persona nuk pësuan lëndime nga të shtënat me armë. Ndërkohë, policia sekuestroi në vendngjarje në cilësinë e provës materiale 18 gëzhoja armë zjarri model 56 të kalibrit 7.62mm, 1 fishekë i pa plasur model 56 të kalibrit 7.62mm si dhe një automjet tip ‘Volkswagen’ me targa AA 226 ES në pronësi të shtetasit Albi Bashaliu.
Ky i fundit është vëllai i Leonard Bashaliut, i cili është i dënuar me burg, pasi në qershor të këtij viti ka vrarë Ylben Xhahysën, për një konflikt të ndodhur 5 vite më parë ku viktima i kishte gërvishtur makinën.
Albi Bashaliu është vrarë sot në të njëjtën vend ku vëllai i tij, Leonard Bashaliu vrau 6 muaj më parë Ylben Xhahysën pas sherrit për gërvishtjen e makinës.
Pista kryesore për vrasjen dyshohet hakmarrja, pasi vëllai i viktimës është në burg për një vrasje të kryer në qershor të këtij viti.
