Mjeku personal i Enver Hoxhës, Isuf Kalo, ka zbuluar në studion e “5 pyetje nga Babaramo” se sa është paguar në atë kohë, dhe çfarë privilegjesh kishte. Ndonëse kanë kaluar shumë vite nga vdekja e tij, dhe rrëzimit të atij sistemi, ende ka shumë kuriozitet se çfarë përfitimesh kishte mjeku personal i Enver Hoxhës.
Për një pjesë të shoqërisë ishte krijuar ideja se ai kishte një pagë të majme. “U krijua një strukturë që ishte Drejtoria e Dytë, që ishte me sigurimin e udhëheqjes, e cila duhet të ketë sugjeruar krijimin e Bllokut, si vend për ta pasur më lehtë ruajtjen e tyre në grup sesa veç e veç. Ishte Drejtoria e Pritjes, që kujdesej për banesat, për veshjen, për ushqimin e udhëheqjes, pra për nevojat jetësore.
Dhe ishte një strukturë e klinikës speciale. Ishte shumë interesante fakti që të tria këto struktura vareshin nga ministri të ndryshme. Struktura e Mbrojtjes dhe e Sigurimit varej nga Ministria e Brendshme, struktura e Pritjes varej direkt nga Kryeministria, nga një zëvendëskryeministër, kurse klinika speciale varej nga Ministria e Shëndetësisë. Kështu që te ne aplikoheshin të njëjtat paga dhe i njëjti sistem si për të gjitha poliklinikat e vendit. Mjeku në Bllok nuk kishte rrogë më të lartë, por sipas skemave që ishin në atë kohë, për të gjithë mjekët”, u shpreh Kalo.
