Për të dhjetën ditë radhazi, Rusia ka regjistruar më shumë se 10 mijë raste të reja nga koronavirusi në ditë.
Kështu në një kohë të shkurtër, vendi është kthyer në shtetin e tretë në botë me numrin më të madh të rasteve, pas SHBA-ve dhe Spanjës.
Sipas Worldometer, vetëm përgjatë muajit maj Rusia ka konfirmuar më shumë se 125 mijë raste me koronavirus. Kjo edhe për shkak të testimit masiv të cilit i është nënshtruar vendi.
Në 24 orët e fundit, në Rusi janë evidentuar 10,899 raste të reja duke e çuar në 232,243 numrin total të rasteve të konfirmuara.
Një rritje e dukshme shihet edhe te numri i viktimave. Brenda 24 orëve të fundit janë shënuar 107 viktima, 13 më shumë se një ditë më parë.
Kështu shkon në 2,116 numri total i personave që kanë humbur jetën nga COVID-19 në Rusi. Në raport me numrin e të infektuarve, numri i viktimave në Rusi është mjaft i vogël.
Kjo duke marrë parasysh se shtetet e tjera që numërojnë po aq të infektuar, shënojnë mbi 10-fishin e viktimave që ka shënuar Rusia.
Më shumë se 43 mijë persona janë shëruar në Rusi, ndërsa mbi 186 mijë raste janë ende aktive. Prej këtyre, 2.300 pacientë ndodhen në gjendje të rëndë shëndetësore.
