Kryeministrja britanike, Theresa May do të kërkojë nga liderët e BE-së, që t’i bashkohen Londrës, në dënimin e Rusisë, për helmimin e dyshuar të ish-spiunit rus, Sergei Skripal dhe vajzës së tij.
BBC raporton se kërkesa e saj për një dënim të fuqishëm nga liderët e Bashkimit Evropian do të bëhet në një samit që do të mbahet sot në Bruksel.
Ndërkohe që një zyrtar i lartë i qeverisë britanike ka deklaruar se: “Ne nuk po kërkojmë konfrontim apo ndryshim të regjimit”.
Sipas tij, Britania dëshiron që liderët e BE-së të pranojnë se: “Rusia është një armik strategjik dhe jo një partner strategjik”, kanë thënë ky zyrtar.
May ka akuzuar Rusinë se ka përdorur agjentin nervor, të njohur si Novichok ndaj Sergei dhe Yulia Skripal. Britania tashmë ka dëbuar 23 diplomatë rusë, në lidhje me këtë ngjarje.
Rusia vazhdimisht ka mohuar çdo përfshirje në këtë incident. Moska i është kundërpërgjigjur Londrës, duke urdhëruar dëbimin e 23 diplomatëve britanikë dhe ka mbyllur Këshillin Britanik në Rusi.
Krerët evropianë gjithashtu duhet të vendosin nëse do të pajtohen me kushtet për një periudhë tranzicioni 21-mujor për Brexit.
