Deputetja e opozitës Rudina Hajdari, i trembet një tjetër pakti Rama-Basha. Në emisionin “45 Minuta” në Report Tv, Rudina Hajdari u tregua mjaft e drejtëpërdrejtë, ndërsa tha se është e pritshme që dy kryetarët e partive më të mëdha në vend, të bëjnë të njëjtën gjë si në 2017.
“E ndjej që janë të prirur për ta bërë këtë gjë, se janë të njëjtët njerëz që kanë bërë marrëveshje më parë. Nëse do i ndryshojmë Shqipërisë imazhin, atëherë duhet të reflektojnë dhe ti thërrasin mendjes”.
Hajdari u ndal edhe të rrjedhja e votave të opozitës në shumë projektligje të shumicës. “Kemi qenë unison në çështjet më të nxehta. Unë nuk mbaj përgjegjësi për çdo njeri. Rrjedhje votash ka pasur gjithmonë edhe më parë. Këta janë deputetë të rinj, nuk e kuptojnë çfarë po bëjnë dhe cila do të jetë e ardhmja e tyre politike dhe mund të ndikohen.
Mazhoranca është mësuar duke bërë shantazhime. Është në integritetin e çdo deputeti më pas vota. Votat nuk kontrollohen me imponim. Kjo lloj taktike, kushtëzim dhe bojkot duhet të eliminohen nga fjalori. Me kërcënim nuk bëhet asgjë. Ne duhet të gjejmë një gjuhë konsensusi”, përfundoi Rudina Hajdari.
