Kryetarja e Grupit Parlamentar Demokrat, Rudina Hajdari ka folur në lidhje me ndryshimet e bëra në Kodin Penal, për ata që shkelin masat e marra për koronavirusin.
Në një intervistë për Report Tv, Hajdari tha se këto ndryshime nuk mund të zbatohen, teksa i cilëson ato si të nxituara, të panevojshme dhe të pazbatueshme.
Ajo tha se këto ndryshime duhen diskutuar me ekspertë, teksa shton se nuk ka transparencë për çfarë po ndodh.
“Grupi demokrat e ka diskutuar dhe jemi në të njëjtin mendim se ndryshimet në Kodin Penal janë të nxituara, të panevojshme të pajustifikuara dhe të pazbatueshme. Jemi në një situatë goxha të menaxhueshme. Nuk besoj se këto masa janë të nevojshme. Nëse ka vakum të Kodi Penal duhet parë në vijim, duhet diskutuar me ekspertë dhe jo në këtë mënyrë, sepse i gjithë informacioni është centralizuar, nuk ka transparencë se çfarë po ndodh. Ne duhet patjetër që t’ia dalim dhe nëse thirrjet për bashkëpunim janë të sinqerta nuk duhet të mbajë informacionin të centralizuar”, tha ajo.
Rudina Hajdari deklaroi se i ka bërë kërkesë Kuvendit për të shtuar edhe 1 orë në seancën e 16 prilli. Kjo pasi sipas grupit parlamentar demokrat, 2 orë nuk janë të mjaftueshme për të diskutuar 24 çështje.
“E kemi parë me vëmendje çështjen e orarit dhe e kemi diskutuar edhe në Konferencën e Kryetarëve, duke qenë se kemi pasur në mendje të kufizojmë kohën dhe mos të qëndrojmë në parlament për një kohë shumë të gjatë. Por mendoj se koha prej 2 orësh është shumë e pakët lidhur me pikat që do të kemi në rendin e ditës për seancën e datës 16 prill, që do të jetë një seancë e jashtëzakonshme. Për ti ardhur në ndihmë deputetëve, për dëshirën që ata kanë që të diskutojnë mbi këto pika dhe ne nuk duhet t’ia kufizojmë fjalën sepse kemi vendosur që të kemi variantin që u diskutua për të pasur të gjithë deputetët të pranishëm, e për këtë arsye nuk duhet tu kufizojmë as fjalën. Unë i kam bërë një kërkesë kryetarit të Kuvendit që të shtyj këtë kohë që kemi në dispozicion, deri në 3 orë jo dy orë që të kemi më shumë kohë”, deklaroi ajo.
