Kryetarja e grupit parlamentar demokrat, Rudina Hajdari, ka bërë një deklaratë të fortë sot në foltoren e Kuvendit. Ajo ka deklaruar se është kërcënuar me jetë në zyrën e saj, ndaj i kërkoi kreut të Kuvendit, të merren masa të rrepta për kontrollimin e personave që kanë akses në Kuvend dhe Kryesi, para se të ketë ndonjë viktimë.
“Ju kam dërguar një shkresë të siguroni ambientet e Kuvendit, dhe ju kam kërkuar të sigurioni ambientet e Kryesisë së Kuvendit. S’mund të ndodhë që deputetët të kërcënohen.
Është e papranueshme që një femër të kërcënohet. Kam patur raste kur persona kanë ardhur në zyrë e më kanë kërcënuar, ka ikur ajo kohë; ju lutem merrni masa përpara se të kemi ndonjë viktimë këtu në Parlament.
Ju kërkoj siç janë masat ne Parlament, ti kemi në Kryesinë e Kuvendit. Asnjë deputet s’mund të hyjë i pakontrolluar, të marrë përforcime me njerëz të tjerë e të shantazhojë deputetë të tjerë.
Më duhet një përgjigje në lidhje me atë shkresë, e të merren masa sa më shpejt të jetë e mundur”, tha Hajdari.
