Mjaft e revoltuar nga çfarë është diskutuar në mbledhjen e Këshillit Politik, Rudina Hajdari ka njoftuar largimin nga tryeza, pasi është folur për tendera. Mjaft e prerë në qëndrimin e saj, ajo tha në një prononcim të shkurtër për mediat se është tejet e trishtë që të flitet për gjëra pa rëndësi.
“Mbledhja nuk ka përfunduar akoma, por kemi gati dy orë që shpenzojmë për tenderin e identifikimit biometrik. Nuk kam ardhur të merrem me tendera, por për të përfaqësuar atë frymë, për të ndryshuar sistemin zgjedhor. Është e pamunduar për të folur këtu për këtë gjë. Është e trishtë të ulem dhe të flasim për gjëra që nuk kanë rëndësi.
Unë u largova nga ky takim dhe për të shpenzuar kohën time me qytetarët, dhe jo që diskutojnë gjëra të parëndësishme. Nuk mund të vazhdojmë të flasim për gjëra që s’kanë rëndësi për qytetarët. Nëse do vazhdojmë me këtë metodë, po i mbylim derën çdo njeriu që ka besim në Reformën Zgjedhore”, tha ajo.
Takimi i sotëm i Këshillit Politik mendohet të jetë i fundit, për të përfunduar dhe vulosur Reformën Zgjedhore. Prej orës 17:00 vijon takimi mes anëtarëve të Këshillit Politik, ku ekspertët e të gjitha palëve dhe ata të OSBE/ODIHR-it po plotësojnë teknikalitetet e të gjithë kuadrit ligjor të Reformës Zgjedhore.
