Pas 28 vitesh, ku lufta e egër ka bërë pis thuajse të gjithë politikanët, Shqipëria e meriton të çelë një kapitull të ri, me një brez të ri liderësh të pashantazhueshëm, për shkak të mëkateve të tyre. Kjo është ajo që mendojnë ndërkombëtarët, por mbi të gjitha shqiptarët. Ndaj, krijimi i një forcë e re politike në gjirin e të djathtës, është mëse i mirëpritur.
Mosbesimi dhe zhgënjimi i shumë shqiptarëve me politikën në këto 3 dekada, është i madh. Por alternativa që ka ofruar së fundmi ish-deputetja demokrate Rudina Hajdari, është interesante. Ajo ka propozuar një ndryshim të sistemit politik, ku deputetët të zgjidhen realisht nga popullit, dhe jo nga krerët e partive.
Këto javë, Rudina Hajdari është sulmuar shpesh për mosmirënjohje ndaj PD, partisë që e bëri deputete. Në politikë mund të hysh në shumë mënyra. Më e rëndësishme është çfarë i jep më pas, çfarë morali përfaqëson, dhe përse do të mbahesh mend. Dhe këtu dallimet mes saj dhe liderit demokrat Lulzim Basha, janë të mëdha.
Basha ka vërtet avantazhin se drejton zyrtarisht një parti me anëtarësi të madhe, dhe me struktura të sprovuara në fushata dhe zgjedhje. Ka pas vetes edhe donatorë të fuqishëm. Por në 15 vite në politikë,nga të cilat 11 në pushtet, është konsumuar jo pak nga akuzat e pasqaruara, për korrupsion me Rrugën e Kombit, apo vrasjet e 21 janarit. Ndërkohë, Rudina Hajdari, vajza e liderit të lëvizjes studentore, Azem Hajdari, e nisi karrierën politike vetëm 2 vite më parë.
Vërtet nën siglën e PD, por e papërlyer dhe e papërfolur për korrupsion apo shkelje ligjore. Sesa do t’i arrijë ajo synimet e saj politike, kjo do të varet nga shumë faktorë. Gjithsesi, qëndrimet e SHBA dhe BE vitet e fundit, dhe sidomos me reformën në drejtësi, nënkuptojnë se kjo klasë politikë, e ka mbushur tashmë kupën me zullumet e saj. Ka ardhur koha e politikanëve të rinj të papërlyer. Dhe në këtë garë, janë të gjithë të mirëpritur./ Tirana Today
