Analisti Fatos Lubonja, teksa komentonte grupin e ri parlamentar, u shpreh se Hajdari dhe Patozi nuk përfaqësojnë askënd dhe nuk sjellin asgjë në këto zgjedhje, përveç se i shërbejnë Edi Ramës.
I ftuar në rubrikën “Opinion”, Lubonja foli dhe për vrasjen e Azem Hajdarit, ku sipas tij u ekzekutua nga disa të fortë që ishin të lidhur me Partinë Socialiste.
“Zonjës Hajdari i thonë e zgjodhën se është e bija e Azem Hajdarit, por për mua problemet e PD fillojnë që me Azem Hajdarin. Pse u vra Azem Hajdari? Për histori të fortësh. Ai u vra nga disa të fortë që ishin të lidhur me PS. Ai u vra sepse ishte tek ata që quhen të fortët e PD. Kjo analizë fillon që me të fortët. E kam dhe me oligarkinë por edhe me ata të fortët e zonave elektorale.
Të thuash që Azem Hajdari ishte një idealist dhe vajza erdhi si e tillë është të mashtrosh, është një problem i madh.
I ke dëgjuar këta të flasin njëherë për vjedhjen tek Astiri, për teatrin që po prishet, për kullat që do të ndërtojë Edi Rama?! I vetmi problem është demokracia në PD. Më fal po a kanë qenë këta në kohën e Berishës? Këta nuk përfaqësojnë dhe nuk sjellin asgjë në këto zgjedhje përveç se një shërbimi për Edi Ramën që të sjellë një fasadë, që ja ku e kemi opozitën. Nga pikëpamja pragmatiste nuk shkon, janë të dështuara. Këta duket që nuk kanë mbështetjen e askujt përveç se të pushtetit”, deklaroi Lubonja.
