Kryetari i Kuvendit të Shqipërisë, Gramoz Ruçi ka uruar Kostas Tasoulas për postin e Kryetarit të Parlamentit të Greqisë.
Në letrën e dërguar, Ruçi i shpreh përgëzimet e tij për zgjedhjen me mbështetje të gjerë, ndërsa thekson se beson në fuqizimin e bashkëpunimit parlamentar. Ndër të tjera, ai fton homologun e tij grek për një vizitë zyrtare dhe miqësore në Tiranë.
“Me rastin e zgjedhjes Tuaj në postin e Kryetarit të Parlamentit të Republikës së Greqisë, më lejoni t’Ju përgëzoj për zgjedhjen Tuaj me një mbështetje aq të madhe si dhe t’Ju uroj shumë suksese në përmbushjes e detyrës impenjuese dhe fisnike. Unë shpreh besimin e plotë se, me zgjedhjen Tuaj në këtë detyrë, marrëdhëniet mes dy vendeve tona fqinje, si dhe shkëmbimet dhe bashkëpunimi midis dy Kuvendit të Shqipërisë dhe Parlamentit të Greqisë do të intensifikohen gjithnjë e më shumë, në interesin tonë të përbashkët. Në këtë kuadër, për mua do të ishte një kënaqësi e veçantë t’ju ftoj, në krye të një delegacioni parlamentar, për një vizitë zyrtare dhe miqësore në Tiranë, në një kohë të përshtatshme për Ju”, shkruhet në letrën e urimit.
