Kreu i Kuvendit ka pritur sot në një takim delegacionin e Parlamentit Evropian në Kryesinë e Kuvendit, i cili mbërriti ditën e djeshme për të ndihmuar në zgjidhjen e krizës politike në vend.
Kryesuesi i delegacionit të PE-së, Tunne Kelam, e quajti situatën aktuale politike në Shqipëri, si një përpjekje për të vonuar çeljen e negociatave për integrimin në BE.
“PE mbetet mbështetës i madh i anëtarësimit të Shqipërisë. Përpjekjet për të vonuar çeljen e negociatave nuk kanë mbështetjen tonë. Reforma në drejtësi, thelbësore për qeverisjen dhe besimin e qytetarëve”- është shprehur Kelam.
Në takim, Ruçi tha se objektivat për integrimin janë drejt përmbushjes dhe reforma në drejtësi po ecën me shumë sukses:
“Objektivat për integrimin drejt përmbushjes dhe reforma në drejtësi po ecën me shumë sukses. Vettingu, jetik për drejtësinë dhe Shqipërinë dhe në qershor organet e reja të sistemit do jenë në funksion të plotë. Reforma në drejtësi ka mbështetjen e 99% të shqiptarëve. Reforma elektorale, paketa e depozituar në Kuvend”.
Po ashtu, kreu i Kuvendit foli edhe mbi djegien e mandateve nga opozita, ndërsa tha se problemet zgjidhen në Kuvend.
“Zgjedhjet e 2017 janë të certifikuara nga 100% e numëruesve të opozitës. Zgjedhjet kanë probleme, por ato zgjidhen në Kuvend. Opozita gëzon të drejta që unë si opozitar nuk i ëndërroja. Basha ka fol dy orë më shumë se Kryeministri. Opozita ka folur tre orë më shumë se maxhoranca, por ka refuzuar të përdorë kontrollin parlamentar”, tha kryeparlamentari.
