Mjeku Pëllumb Pipero deklaroi se shtimi i numrit të rasteve të reja me koronavirus ka të bëjë me anashkalimin e masave mbrojtëse.
Në një intervistë për ABC News, Pipero tha se një pjesë e madhe e mjekëve gjatë punës nuk kanë respektuar protokollin e masave mbrojtëse ndaj koronavirusit.
Pipero foli edhe për rastin e mjekut në Durrës, duke e cilësuar si një gabim të mundshëm. Sipas tij, është vërtetuar se nëse një person e kalon COVID-19 ai nuk mund të infektohet sërish.
“Rasti i mjekut të Durrësit është i veçantë, mund të ndodhë por dhe në botë ka shumë pak raste, dhe në rastet që janë konstatuar në botë ose analiza e parë ose e dytë ka rezultuar jo reale. Dhe rasti konkret në vendin tonë mund të jetë një nga këto gabimet e mundshme ku në rastin e parë mund të ketë qenë fallto pozitiv herën e parë, por fakti që u konstatua i infektuar mjeku duhet të jetë më i kujdesshëm. Një person që infektohet dhe e kalon sëmundjen një herë ,m teorikisht është e pamundur që të infektohet, por nëse nuk kemi qenë të sëmurë por mendojmë se kemi qenë të tillë atëherë problemi është më kompleks, por ne duhet të jemi të vëmendshëm dhe të zbatojmë me përpikmëri protokollin e masave mbrojtëse sidomos ne mjekët në spital. Qytetarët duhet të vendosin maskën në një mjedis të mbyllur dhe në rrugë të respektojnë distancën derisa epidemia të jetë shuar. Në një ambient që nuk ruhet distanca më shumë se një metër atëherë duhet që patjetër të vendosim maskë, maska duhet të jetë me ne deri në ikjen e koronavirusit”, tha ai.
Pipero theksoi se edhe nëse do të ketë një valë të dytë të virusit, nuk do të kemi më masa kufizuese si ato që u ndërmorën më herët.
“Që nga momenti që janë hequr masat kufizuese, përgjegjësia është individuale, dhe përgjegjësi në këtë situatë është që të jemi koshient se virusi është në qarkullim edhe nëse i ka rënë virulenca. Thelbi i të gjithë kësaj gjëje është kujdesi, pa u shuar epidemia ne duhet të jemi vigjilent, distancë maskë dhe kujdes i shtuar, ky është dhe mësimi historik që ne kemi marrë nga kjo pandemi historike. Unë do të këshilloja që çdo institucion të ketë një sasi rezerve dhe qytetarët që nuk kanë maskë ose të pajisen me maskë ose tu refuzohet shërbimi, por e mira është që të marrin të dyja, sa kohë që është në qarkullim dhe nuk kemi një vaksinë është i rëndësishëm kujdesi dhe qytetarët të mos e nënvlerësojnë distancimin social dhe të përdorimin e masave mbrojtëse. Duhet të zbatojmë dy norma bazike, distancë, maskë në mjedis publik, dhe higjiena e duarve, për të mos qenë më të mbyllur. Edhe nëse do të ketë një valë të dytë nuk do të ketë më mbyllje dhe ngrirje te jetës, pasi ky virus i panjohur tashmë është i njohur nga shkenca dhe nuk kemi më asnjë arsye që të kthehemi sërish pas. Do të kishim dashur që qershori të ishte pa raste, por unë theksoj se një rast i tillë shumë shpejt në një hark kohor prej 2-3 ditësh numrat do të bien”, shtoi ai.
