Kryeministri Rama paralajmëroi rritje të çmimit të energjisë, deri në 6 muajt e parë të 2022. Ai tha se ka një krizë energjetike globale, dhe për rrjedhojë pasojat po ndihen dhe në Shqipëri. Lidhur me këtë çështje, një reagim është pasuar nga ish-ministri i Drejtësisë në qeverinë Rama 1, Ylli Manjani.
Ai ka shprehur qëndrimin e tij, pasi kryeministri Edi Rama paralajmëroi krizën e madhe energjetike, e për pasojë edhe rritjen e çmimeve. Manjani tregon si qeveria Rama ka hapur gropat financiare.
Një ditë më parë, kryeministri Edi Rama iu drejtua qytetarëve shqiptarë me një mesazh, duke paralajmëruar se bota aktualisht po vuan një krizë të jashtëzakonshme energjetike, dhe se pasojat po fillojnë të ndihen edhe në Shqipëri.
Kjo krizë energjetike ka ndikuar drejtpërdrejtë në rritjen e çmimit të karburanteve, ku çmimet do të jenë të larta dhe ndikimin më të madh do e kenë familjarët dhe bizneset. Manjani thotë se edhe sikur Shqipëria të kishte ekonominë gjermane, është e pamundur që të mbulohen këto gropa. Ai është i mendimit se paratë e ardhura nga droga, e ka fshehur disi situatën, sepse ka rritur “lumturinë” e përkohshme, por kriza sa vjen edhe thellohet.
Statusi
Problemi real është se gropat financiare që Bosi ka çelur nga:
- Korrupsioni e keqmenaxhimi i ndërmarrjeve publike, të ujsjellësve dhe energjisë,
- Kontratat e konçensioneve të pafavorshme dhe me fatura të kripura financiare,
- Thellimi katastrofik i borxhit publik,
nuk i mbulon dot as me çmimet e rritura të shërbimeve. Edhe sikur këtu të kishim ekonominë gjermane dhe shteti të tarifonte e taksonte gjermanë, prap nuk mbulohen këto gropa. Janë shumë të mëdha. (Se udhëheqësit tanë pozitë e opozitë ëndërrojnë të qeverisin Gjermaninë)
Paraja marramendëse e drogës e ka fshehur disi situatën sepse ka rritur “lumturinë” e përkohshme. Por gropat janë aty…
Këtyre gropave duhet tu shtojmë edhe gropat në ekonomitë familjare që shkaktoi COVID dhe tërmeti. Kanë harxhuar shumë, po shumë para njerëzit nga këto fatkeqësi. Ndërkohë rritja e çmimeve thellon gropat financiare të familjeve…
Tani mbetet të shohim sa të thella janë gropat e kullave që ndërtohen e nuk shiten…
Ndërkohë pak shpresa ka nga humnera opozitare.
Kriza nuk është thjesht energjitike, por e gjithanshme. Nuk qenka e thënë të ndahemi nga Sudet!!!
Zoti na ruajtë!
