Numri i personave të infektuar me COVID-19 në Shqipëri është rritur, duke shkuar në 361.
Informacionin e mësipërm e ka konfirmuar Drejtorja e Institutit të Shëndetit Publik, Albana Fiço, përgjatë një deklarate për mediat.
Ajo informoi qytetarët mbi situatën e COVID-19, teksa pohoi:
“Gjatë 24 orëve të fundit që lamë pas janë testuar 149 persona të dyshuar, prej të cilëve janë konfirmuar 28 raste me COVID-19 nga të cilët 1 është fëmijë.
Deri në këto momente janë testuar 2396 raste të dyshuara dhe janë konfirmuar pozitivë me COVID-19, 361 raste.
Mosha mesatare e rasteve pozitive me COVID-19 është 50 vjeç. Në Spitalin Infektiv aktualisht gjenden të shtruar 64 pacientë, 5 prej të cilëve janë në terapi intensive, ndërkohë që 1 mbetet i intubuar.
Në Spitalin COVID 2 Shefqet Ndroqi ndodhen 7 pacientë të shtruar, 6 prej tyre në terapi intensive”.
Kujtojmë se deri më tani 20 persona kanë humbur jetën në vendin tonë si pasojë e koronavirusit.
