Qytetarët e Durrësit pas pak ditësh do të përballem më rritjen e çmimit të biletës për transportin urban.
‘Ora News’ tregon se në mbledhjen e fundit, Këshilli bashkiak vendosi çmimin 40 lek për biletë, nga 30 që është aktualisht. Por vendimi është i panjohur për qytetarët, të cilët shprehen se bileta e re do të rëndojë xhepat e tyre.
Bileta e shërbimit u rrit me 10 lek në mbledhjen e 11 marsit të Këshillit bashkiak, ku votat e PS-së e një pjesë të këshilltarëve të LSI miratuan propozimin e Bashkisë.
Rritja e biletës ka qenë një kërkesë e vazhdueshme e operatorëve në qytetin bregdetar me argumentin se nuk mbulojnë dot kostot, por propozimi i Bashkisë duket se nuk është konsultuar.
Qytetarët veç mungesës së informacionit flasin edhe për kosto sociale që mund të shkaktojë rritja e çmimit për një shërbim publik.
Ndërkohë, Bashkia e Durrësit shprehet se rritja e çmimit do të sjellë efekte në përmirësimin e transportit urban.
