Një ngjarje e rëndë është regjistruar në Turqi, ku një aeroplan i vogël i forcave të policisë është rrëzuar në një mal.
Ministria e Brendshme turke njoftoi se shtatë oficerët që ndodheshin në bord kanë humbur jetën si pasojë e aksidentit.
Avioni i cili po kthehej nga një mision vëzhgim-zbulimi, u rrëzua në malet Artos në provincën lindore të Vanit, afër kufirit me Iranin.
Sipas ministrit të Brendshëm, avioni u zhduk nga radari mes zonës së Van dhe provincës fqinje të Hakkari, e cila shtrihet më larg në jug dhe kufizohet me Iranin dhe Irakun.
Mbetjet e avionit u gjetën rreth orës 3 të mëngjesit, me orën lokale. Të gjithë personat në bord, përfshirë dy pilotët, ishin anëtarë të policisë kombëtare.
