Një javë më parë në emisionin “Historia e Fundjavës” u prezantua historia e familjes Rrapo, e cila kërkon ndihmë për të kuruar vajzën e tyre të sëmurë, Alesian.
7-vjeçarja vuan nga një sëmundje e këmbëve që e pengon të ecë, të vrapojë dhe i shkakton shumë dhimbje.
Pas apelit të shfaqur të dielën e kaluar, ‘Fundjavë Ndryshe’ i mundësoi Alesias kryerjen e analizave të nevojshme për diagnostikimin e sëmundjes.
Mjekët informuan se asaj i nevojitet një operacion, që mund të kryhet vetëm në Turqi.
Bamirës të ndryshëm, plotësuan shumën e nevojshme për kryerjen e operacionit dhe Alesia do të niset për në Turqi.
Por, jo vetëm kaq. Themeluesi i ‘Fundjavë Ndryshe’, Arbër Hajdari, dha një tjetër lajm të mirë.
Hajdari tha se për rastin e Alesias u mblodhën më shumë para se sa ishte parashikuar, ndaj dhe është vendosur që të restaurohet shtëpia e familjes Rrapo.
Arbër Hajdari: ”Rasti i Alesias preku zemrat e disa njerëzve, të cilët donin që të mernin përsipër ndërhyrjen e saj. Për këtë fakt, ne kemi grumbulluar më shumë para se sa nevojitej. Pra, për operacionin e Alesias duheshin 4,500 euro, dhe ne pamë ambientet ku jetonte familja Rrapo. Për këtë, ne kemi vendosur që t’i rregullojmë edhe shtëpinë. Ne do t’ia lëmë suprizë Alesias shtëpinë. Kur të kthehet Alesia nga Turqia do të gjejë një shtëpi të re dhe një mjet transporti për të shkuar në shkollë.”
