Ministrja e Shëndetësisë, Ogerta Manstirliu, ka folur lidhur me rreziqet e mundshme që mund të pasojnë pas hapjes së shkollave.
Në një intervistë për emisionin “Opinion”, Manastirliu tha se janë analizuar disa skenarë lidhur me rreziqet që mund të vijnë nga kjo situatë.
“Nuk ka qenë një vendim i lehtë. Jemi konsultuar me ekspertët më të mirë vendas, por gjithashtu edhe me rekomandimet që kanë dalë në kuadër të studimeve të organizuara nga OBSH apo Qendra Evropiane e Sëmundjeve, mbi çfarë ka ndodhur gjatë pandemisë, sa i përket hapjes së shkollave. Kemi analizuar gjatë situatën epidemiologjike, duke vendosur disa skenarë për riskun.
Hapja e shkollave, pavarësisht protokolleve të sigurisë që të gjitha shkollat kanë marr masa për t’i zbatuar, ka rrezik për rritjen e rasteve dhe shfaqjen e grupimeve me Covid, por ky rrezik është i ulët”, tha ajo.
Manastirliu theksoi se nëse merren masat e duhura ka pak gjasa që shkollat të kthehen në vatra infektimi.
“Të dhënat e deritanishme tregojnë se transmetimi në shkolla ka qenë i rrallë dhe nëse merren masa, ka pak gjasa që këto mjedise të kthehen në vatra infektimi, siç janë vendet me densitet të lartë”, shtoi ajo.
