Hapja e kinemave do të kryhet duke respektuar një sërë rregullash, duke u dhënë mundësi qytetarëve të argëtohen por në të njëjtën kohë me rëndësi është shëndeti i tyre. Ministria e Shëndetësisë njoftoi dje për hapjen e kinemave në vend, 7 muaj pas mbylljes së tyre për shkak të masave anti-Covid.
Në urdhrin e ministrisë thuhej se kinematë duhej të respektonin një udhëzues, i cili është bërë publik ditën e sotme. Ndër rregullat bazike janë prenotimet e biletave online. Po kështu nuk do të lejohet ushqimi dhe pijet në ambientet dhe sallën e kinemasë.
Nëse do të identifikohet një rast pozitiv me Covid-19 në kinema, duhet që të pastrohet, lahet dhe dezinfektohet menjëherë e gjithë salla. Gjithashtu nëse konstatohet nga stafi ndonjë rast i dyshimtë me Covid-19, klienti/personeli do të detyrohen të kthehen në shtëpi dhe të flasin me mjekun e familjes.
Klientëve do ju matet temperatura në hyrje dhe kushdo që e ka temperaturën mbi 37.5 nuk do të lejohet të futet brenda në sallën e kinemasë. Filmat do të shfaqen me interval pushimi jo më pak se 15 minuta nga njëri-tjetri, për të shmangur grumbullimet mes njerëzve dhe për të bërë pastrimin e ventilimin e sallave.
