Të tjera detaje kanë dalë lidhur me grabitjen e një mjeti transporti parash dhe valutash të një kompanie private sigurie. Ngjarja është shënuar mesditën e sotme në afërsi të Qafë Kasharit.
Mësohet se disa autorë, ende të paidentifikuar kanë arritur të marrin një shumë të konsiderueshme nga një makinë e “Security Spartan”, duke kërcënuar dhe ushtruar dhunë fizike ndaj personave që ndodheshin brenda në mjet.
Sipas “BalkanWeb”, në momentin kur po transportoheshin me makinë të shërbimit privat, autorët dyshohet të kenë marrë shumën prej rreth 30 milionë lekë të reja.
Tiranë/Informacion paraprak
Rreth orës 12:40, në afërsi të Qafë Kasharit, persona të paidentifikuar kanë marrë me forcë një automjet në pronësi të një firme private Security dhe me pas automjetin e kanë braktisur në rrugën dytësore të autostradës Tiranë-Durrës.
Shërbimet e policisë kanë shkuar menjëherë në vendngjarje dhe vijojnë kontrollet dhe krehjen e zonës ku u gjet mjeti i braktisur me qëllim kapjen e autorëve.
Grupi hetimor nën drejtimin e Prokurorisë po kryen veprimet për administrimin e çdo prove të vlefshme që do t’i shërbejë hetimit për identifikimin e autorëve dhe zbardhjen e ngjarjes.
