Kanë rifilluar ditën e sotme punimet për ndërtimin e 4 pallateve pesëkatëshe në Kodër Vilë, edhe pse ka një vendim nga drejtoria Rajonale Arkeologjike për pezullimin e tyre.
Mbetjet arkeologjike të gjetura gjatë gërmimeve ishin edhe arsyeja pse punimet u pezulluan, pasi arkeologët donin t’i studionin nga afër ato.
Ndërkohë, mësohet se banorët e zonës, kanë bërë një kërkesë për anulimin e projektit pasi iu rrezikohen banesat ku jetojnë. Me frikën për rrëshqitjen e tokës e shembjen e shtëpive, banorët apelojnë strukturat përkatëse të marrin masa për të parandaluar një tragjedi të mundshme.
Sipas banorëve, të cilët u prononcuan për News24, mjetet e tonazhit të rëndë të cilat rinisën punën mëngjesin e kësaj të premteje, e kanë prerë ujin e pijshëm, teksa shtojnë se iu janë drejtuar policisë së shtetit por nuk kanë gjetur mbështetje.
Prishja e kurorës së gjelbër në zonën e Kodër Vilës në Durrës për ndërtimin e 4 pallateve, ka alarmuar prej muajsh banorët e zonës të cilët kërkojnë pezullimin e punimeve. Por Gjykata e Apelit i dha të drejtë firmës ndërtuese, duke iu hapur rrugë punimeve për ndërtimin e kompleksit.
