Pas më shumë se një muaj prej tërmetit të 26 nëntorit, ende shumë familje janë të pasigurta për fatin e tyre. Prej fillimit të muajit dhjetor, qeveria krijoi Komitetin e Rindërtimit, i cili do të merret me programin e rindërtimit të gjitha banesave të shkatërruara prej tërmetit.
Pjesë e këtij Komiteti është edhe drejtuesi i fondacionit “Fundjavë Ndryshe”, Arbër Hajdari. Nëpërmjet një interviste për “Zërin e Amerikës”, ai foli për procesin e rindërtimit, bashkëpunimet me kompani të njohura ndërkombëtare, si dhe fondet e mbledhura prej tyre.
Hajdari bëri me dije se puna prej tyre, për ringritjen e banesave, do të nisë prej javës së ardhshme. Sipas tij, projekti i studiuar më parë me shumë arkitektë, konsiston në ndërtimin e shtëpive parafabrikat.
“I kam propozuar qeverisë një projekt, për të sjellë në Shqipëri shtëpitë e parafabrikuara. Ky ka qenë një projekt që ne e kemi studiuar së bashku me arkitektë që para se të binte tërmeti, por tani erdhi koha e duhur për ta propozuar.
Është pritur mirë nga qeveria, është pritur mirë edhe nga organizata të ndryshme dhe jemi në një koordinim të gjithë së bashku. Kemi ndarë disa zona, aty ku do të bëjmë projektet e banesave. Na është caktuar Qarku i Tiranës, dhe menjëherë këtë javë që vjen, nisim punën për të ndërtuar shtëpitë e reja të parafabrikuara”.
Drejtuesi i “Fundjavë Ndryshe” shtoi se një nga propozimet e bëra ndaj qeverisë ka qenë heqja doganore dhe fiskale e këtyre shtëpive, të cilat do të vijnë nga Turqia.
“Ne i kemi propozuar qeverisë shqiptare heqjen e taksave doganore dhe fiskale të shtëpive të parafabrikuara, të cilat do të vijnë nga fabrikat më të mëdha të Turqisë. Është gati 1/3 e një banese të zakonshme për kostot.
Janë shtëpi, ashtu siç janë pothuajse një pjesë e madhe e shtëpive të ndërtuara këtu në SHBA. Janë realisht shumë të mira dhe ne erdhëm te ky projekt, sepse duam që të strehojmë një numër të madh familjesh me gjithë fondet që janë grumbulluar nga ne si “Fundjavë Ndryshe”, apo nga organizata të tjera, apo edhe nga vetë qeveria”./ TIRANA TODAY
