Ministrja e Arsimit, Besa Shahini ka komentuar vendimin e saj për të rikthyer më 18 maj në bankat e shkollës maturantët.
E ftuar në emisionin “Top Talk”, Shahini tha se ky vendim është kundërshtuar nga opozitarët, duke e akuzuar se po rrezikon jetën e nxënësve.
Ajo thekson se ky vendim është marrë në mënyrë që nxënësit të kthehen në shkollë për të bërë konsultime dhe që të përgatiten sa më mirë për provimin final.
Ministrja sqaroi se janë marrë masat e nevojshme për të siguruar mbrojtjen e nxënësve.
“Vendimi për të rikthyer maturantët u mor që nxënësit të bëjnë përgatitjet për provimi. Kemi marrë masa për ta. Do të ketë maksimumi 10-12 nxënës nëpër klasa i kemi shpërndarë. Me një plan specifik në shkollat e mesme por kemi përdorur edhe shkollat 9-vjeçare. Emrat do t’i kenë në klasë dhe do hyjnë e do dalin sipas protokollove të detajuar për të ruajtur distancën dhe të mos rrezikojnë njëri tjetrin”, tha ajo.
