Nga nesër do të hapet transporti publik dhe ndërqytetës në Shkodër, Fier, Korçë dhe Vlorë. Aktualisht këto qytete janë lajmëruar se do të fillojnë rihapjen e transportit në masa të rrepta sigurie.
Pak më herët, në një deklaratë për mediat, ministrja e Shëndetësisë Ogerta Manastirliu lajmëroi hapjen e transportit publik, e cila ndonëse nuk dha një datë fikse, tha se do të ketë masa strikte, ku një prej tyre është vendosja e maskës.
Shoqata e transportit publik në Tiranë refuzon të rinisë aktivitetin pa u ndryshuar protokolli dhe pa u plotësuar kërkesat që ata kanë. Eneo Sulejmani, kryetar i shoqatës brenda dhe ndërqytetas ka thënë se aktualisht është e pamundur që të rifillojë transporti, pasi nuk respektohet protokolli.
“Ministria e Shëndetësisë hoqi masat kufizuese, por është në fuqi protokolli i sigurisë. Së dyti ne presim një vendim nga Ministria e Infrastrukturës. Është e pamundur që të fillojë transporti, pasi nuk respektohet protokolli. Do konsultohemi me operatorët qytetas dhe ndërqytetas dhe 90% e tyre me këtë protokoll sigurie nuk dalin në punë, e kanë të pamundur”, tha ai në një prononcim për ‘REPORT TV’.
“90% e operatorëve janë për mos rifillimin e punës me këtë protokoll. Ai krijon vështirësi financiare. Së pari në transportin qytetas ul me 75% numrin e udhëtarëve në automjet. Dhe në transportin ndërqytetas e ul me 50%. Këto janë kosto financiare. Së dyti subjektet përgjegjëse detare dhe ajrore nuk janë përgjegjëse për distancën, por për informimin e tyre. Pse ne duhet të ndëshkohemi”, përfundoi Sulejmani.
