Kryeministri Avdullah Hoti, ka konfirmuar se aktakuza ndaj presidentit Hashim Thaçi dhe kryetarit të PDK-së, Kadri Veseli, kanë ndaluar takimin e parashikuar më 27 qershor në Washington.
Në konferencën e paralajmëruar për mediat, shefi i ekzekutivit tha se ka marrë dritën jeshile nga Richard Grenell, për një takim të radhës.
“Zhvillimet politike, në veçanti që kanë ndodhur në Kosovë e kanë ndërruar dinamikën për neve si qeveri, pas aktakuzës nga Gjykata Speciale. Pavarësisht, ne mbesim të përkushtuar për dialog. Besojmë thellë se dialogu s’ka alternativë. Këtë qëndrim e kam prezantuar edhe dje tek zyrtarët evropianë”.
“Është në interes të Kosovës që ky provës të përmbyllet sa më shpejtë. Për shkak të zhvillimeve që kanë ndodhur ditëve të fundit, ne e kemi shty vizitën në Washington. Kam pas kontakte me Grenellin. Së shpejti do të caktohet data për takim, agjenda mbetet e njëjta. Takimi do të mbahet së shpejti i kryesuar nga kryeministri”, ka deklaruar ai.
Politika shqiptare ka qenë e unifikuar në qëndrimin për Kosovën, dhe luftën e shenjtë të UÇK-së, pas akuzave për krime lufte ndaj Hashim Thaçit dhe Kadri Veselit.
Dje, presidenti i Serbisë, Aleksander Vuçiç, komentoi për herë të parë aktakuzën e paraqitur nga Zyra e Prokurorit të Specializuar me seli në Hagë, ndaj presidentit të Kosovës Hashim Thaçi, kryetarit të Partisë Demokratike të Kosovës, Kadri Veseli dhe të tjerëve. Vuçiç ka thënë se gjëja me e rëndësishme për Serbinë është të tregojë përmbajtje ndaj kësaj situate.
