Kryeministri Edi Rama ka dalë mbrëmjen e sotme live në Facebook, me një tjetër thirrje të rëndësishme për shqiptarët.
Kreu i qeverisë iu kërkon qytetarëve që të mos i tregojnë problemet e tyre te faqja e tij në Facebook, por t’i drejtohen portalit të posaçëm “shqipëriaqëduam.al”.
“Mos shkruani më në Facebook, sepse nuk merrni përgjigje dot. Është shumë qesharake, që të drejtoheni te portali i urgjencës dhe pastaj kur iu marrim të thoni që ‘unë doja ta provoja’. Këto nuk janë shaka për këtë kohë. Shqipëriaqëduam.al është e vetmja rrugë për problemet. Është një ngarkesë e një natyre të jashtëzakonshme. Jemi në luftë, është një luftë reale, botërore, ja future gjithë shtetet e botës në shtëpi. Asnjë shtet nuk po bën çudi. Ne nuk e zbrazim dot arkën e shtetit për një muaj”, tha ai.
Rama foli edhe në lidhje me riatdhesimin e shqiptarëve që kjo situatë e vështirë i ka gjetur jashtë kufijve të Shqipërisë.
Ai sqaroi se sot do të riatdhesohen 1379 shqiptarë që janë në listat e përgatitura nga ambasadat.
“Sot do të riatdhesojmë 1379 shqiptarë. Që të jemi të qartë, nuk do të riatdhesojmë ata që jetojnë jashtë. Lasgushi do të mbledhë ata njerëz që janë në listat e përgatitura nga ambasadat, asnjë më shumë. Dua t’iu them shumëkujt që janë këtu dhe që kanë vënë kujën pse po i marrim këta. Kjo është të flasësh në hava. Mos flisni si për shtëpinë e botës. Si ka mundësi me këto cinizma e dëngla. Ne jemi në luftë”, tha kryeministri.
