Vijon pa reshtur misioni i kërkim-shpëtimit nga forcat zjarrfikëse shqiptare dhe ato të huaja.
Ndërkohë mësohet se dy trupa të tjerë të pajetë janë nxjerrë nga rrënojat e një pallati në Durrës. Sipas informacioneve paraprake, viktimat janë Dolora dhe Klaus Reçi, nënë e birë.
Tragjedia në familjen Reçi është thelluar, pasi numri i viktimave ka shkuar në 3, pasi më herët ka vdekur dhe 25-vjeçarja, Kristi Reçi.
Kanë kaluar 39 orë nga tërmeti i fuqishëm 6.4 ballë që goditi vendin mëngjesin e së martës. Që nga ajo kohë ka pasur edhe lëkundje të tjera të vazhdueshme, ku më i fundit ishte ky i pasdites së sotme prej 5.6 ballësh.
Pasoja më të rënda janë shënuar në Durrës dhe Thumanë, ku edhe janë shënuar viktima. Deri më tani janë raportuar se janë gjetur trupat e 34 viktimave, ndërsa kërkimet vijojnë akoma.
