Ish-ministri i Shëndetësisë, Tritan Shehu, ka akuzuar qeverinë se ka dështuar me menaxhimin e situatës me koronavirusin. Madje ai shtoi më tej dyshimet se është manipluar me të dhënat, ku sipas tij, nuk janë raportuar sikundër ka qenë situata.
“Fakti që kemi një numër kaq të lartë të infektuarish, tregon për një dështim të qeverisë, dështimin e plotë të masave për të parandaluar pandeminë. Tregon atë që kemi thënë prej kohësh, se jemi para një situate që nuk është e pasqyruar sipas të dhënave dhe prandaj nuk mund të shoqërohet me masa racionale”, tha ai në “Ora News”.
Ish-ministri u shpreh se masat e ndërmarra kanë qenë ekstreme dhe absurde. Sipas tij, numrat në rritje janë si pasojë e politikave, paaftësisë dhe mungesës së transparencës në raport me luftimin e COVID-19.
“Kemi masa ekstreme dhe absurde, që në shumicën e rasteve ishin të kundërta me ato që duheshin marrë. Mjeku i familjes që është baza e parandalimit, është anashkaluar këtë periudhë. Kjo që po ndodh është ajo që pritej si pasojë së politikave dhe paaftësisë dhe mungesë së transparencës së kësaj qeverie në raport me luftimin e COVID-19”.
Shehu i mëshoi fort faktit se gjithçka është bërë për propagandë, pasi komiteti teknik nuk u pa kurrë aktiv dhe nuk kishte kundërshti apo mendime ndryshe me qeverinë.
“Gjithçka që është bërë këtu, është bërë për propagandë. Kishim një komitet që asnjëherë nuk u pa të ishte aktiv, apo të kishte një mendim ndryshe në raport me qeverinë. Nuk u shfrytëzuan të gjitha kapacitetet laboratorike në vend, por u mbajtën vetëm dy laboratorë në mënyrë inkuzicionale, ashtu sikurse kanë bërë të gjitha vendet e tjera”.
