Ish-presidenti Bamir Topi është pyetur nëse ka ndonjë këshillë për t’i dhënë kryeministrit Edi Rama, por refuzoi.
I ftuar këtë mbrëmje në emisionin “Aktualitet”, Topi u shpreh se nuk iu jep këshilla njerëzve që vetëm flasin, e nuk dëgjojnë.
“Unë refuzoj ti jap këshilla Edi Ramës në mënyrë më absolute. Refuzoj sepse kam konstatuar se janë një grup njerëzish që flasin e flasin por nuk dëgjojnë. Nuk jap këshilla për njerëzit që nuk dëgjojnë. E shikoj se nuk shkohet më në këtë drejtim.
Me sa duket kanë një axhendë tjetër që nuk mund të jetë kurrë edhe axhenda ime. Sa më larg të shkosh kam kuptuar se duhet të sillesh në mënyrë sa më demokratike”, deklaroi Topi.
Nga ana tjetër, ish-presidenti nuk njeh asnjë arritje të kësaj qeverie, ndërsa thekson se “veprat e mëdha” janë bërë në kohën kur qeveriste Partia Demokratike.
“Veprat e mëdha rrugore, faktorizimi i shqiptarëve në Rajon, Pavarësia e Kosovës, anëtarësimi i vendit në NATO, marrëveshja e Stabilizim Asocimit, nuk kanë ndodhur në kohën e Ramës, por kanë ndodhur në një kohë tjetër.
Të dalë dhe të thotë një arritje që ka bërë. Duhen thënë disa gjëra. Nuk e kisha menduar se do të performonte në një mënyrë aq skandaloze”, shtoi Topi.
