Mund të duket e pabesueshme, por një pelë ka qenë një ndër “ushtarët” më të dekoruar nga SHBA gjatë Luftës së Koresë. Kali femër, që njihej me nofkën “Reckless” (E Shkujdesura), ishte e racës mongole.
Ajo kishte lindur rreth vitit 1948, teksa u ble në vitin 1952 në një hipodrom në Seul për 250 dollarë nga ushtarët amerikanë. Pela u trajnua që të angazhohej në operacionet ushtrarake. Ajo u miqësua shumë me marinsat. Hynte lirshëm në çadrat e tyre, dhe flinte aty netëve të ftohta.
“Reckless” hante thuajse çdo gjë që hanin ushtarët: vezë të skuqura, patate të skuqura, ndërsa pinte birrë dhe Coca-Cola.
Ajo ishte pjesë e aksioneve të shumta luftarake gjatë Luftës Koreane, duke mbajtur mbi shpinë furnizime ushqimore dhe municione. Pela u përdor edhe për të evakuuar të plagosurit.
Pasi mësoi rrugët, ajo shkonte dhe vinte vetë, pa e shoqëruar njeri. Ngjarja kryesore e “karrierës” së saj 9-mujore ushtarake, ndodhi në fund të marsit 1953, kur brenda një dite të vetme, bëri 51 rrugë e vetme për të furnizuar me municione disa njësi ushtrarake. Pela u plagos dy herë në luftime.
Ndërsa në vitin 1954 iu dha grada e rreshteres. Gjithashtu, pas luftës iu dhanë dy Zemra të Purpurta, Medalja e Sjelljes së Mirë e Korpusit Detar, dhe nderime të tjera ushtarake. Ajo u bë shumë e famshme, kur u çua në SHBA. Revista “LIFE”, e cilësoi pelën si një nga 100 heronjtë amerikanë më të mëdhenj të të gjitha kohërave. “Reckless” lindi 4 pasardhës, dhe vdiq në majin e viti 1968.
Në nderim të saj u vendos një pllakë përkujtimore, ndërsa në vitin 2013 një statujë bronxi në Muzeun Kombëtar të Trupave Detare në Virxhinia./ TIRANA TODAY
