Nga sot, Policia e Kosovës ka hequr targat e mjeteve që hyjnë nga Serbia, duke aplikuar masa reciprociteti. Kujtojmë këtu se Kosova kishte paralajmëruar vendosjen e masës së reciprocitetit për targat, gjatë raundit të fundit të dialogut me Serbinë, të ndërmjetësuar nga Bashkimi Evropian.
Zëdhënësi i BE-së për Politikë dhe Siguri të Jashtme, Peter Stano, ka folur në një konferencë për media, pas vendosjes të reciprocitetit për targat.
Ai kërkoi nga të dyja palët që të ndalin tensionet, duke apeluar për dialog të zgjidhjes së mosmarrëveshjeve. Stano ka thënë se Kosova dhe Serbia duhet të përdorin dialogun si platformën e vetme, për të zgjidhur të gjitha çështjet e hapura që mund t’i kenë të dy vendet.
“Jemi duke vëzhguar situatën nga afër, dhe dua të theksoj liria e lëvizjes është një kusht themelor i BE-së dhe këtë e presim edhe nga Kosova dhe Serbia që ta promovojnë atë. Ne u bëjmë thirrje të dyja palëve që të përmbahen dhe të reduktojnë tensionet. Menjëherë dhe pa ndonjë vonesë”.
