Prokurorja e Përgjithshme e Përkohshme, Arta Marku, ka reaguar menjëherë pas kërkesës së KLP-së, për nisjen e një hetimi disiplinor ndaj prokurorit Arjan Ndoji.
Këtij të fundit, pak ditë më parë iu bë atentat në mbikalimin e Shkozetit. Prokuroria e Përgjithshme njofton se ka nisur verifikimi i fakteve, për rastin e prokurorit Arjan Ndoja.
“Prokurori i Përgjithshëm, znj. Arta Marku, prej ditës së djeshme dt 05.11.2019, ka filluar verifikimin e fakteve të bëra publike në rastin e prokurorit Arjan Ndoja. Verifikimet konsistojnë në mbledhjen e të dhënave, për shkeljen e rregullave të papajtueshmërisë me funksionin e magjistratit, parashikuar në nenin 103 shkronja “a” të ligjit 96/2016 “Për statusin e gjyqtarëve dhe prokurorëve në Republikën e Shqipërisë”.
Arjan Ndoja ishte në makinë me shoferin e tij Andi Maloku, dhe Pëllumb Muharremin. Ky i fundit, një person me precedent penal dhe i njohur me nofkën “Rumi”. Të tre këta persona po udhëtonin me makinën e prokurorit më 1 Nëntor, kur në autostradën Tiranë-Durrës, tek mbikalimi i Shkozetit u qëlluan nga një automjet tjetër në ecje.
