46 qytetarë të Maqedonisë së Veriut humbën jetën, dhe 7 të tjerë janë lënduar rëndë në aksidentin që klasifikohet si i pari për nga pasojat në dekadën e fundit në Europë. Dje, një autobus i Maqedonisë së Veriut është përplasur me mbrojtëset e rrugës në afërsi të fshatit bullgar Bosnek, afër Pernikut, në Bullgari. Mes personave që kanë humbur jetën kanë qenë 12 të mitur, mes të cilëve edhe 2 djem binjakë.
Gjatë transmetimit të lajmeve në kanalin “Alsat-M”, spikerja nuk i përmbajti dot lotët e pikëllimit. Ministria e Transporteve të Maqedonisë së Veriut ka bërë me dije se kompania “Besa Trans”, autobusi i të cilës u përfshi në aksidentin në Bullgari, ka pasur licencë pas plotësimit të kushteve respektive, që nga 08.08.2018 deri më 08.08.2022.
Pronari i kësaj kompanie, Azdren Ziberi ka shprehur ngushëllime për të gjithë familjarët e viktimave dhe ka qenë në vendngjarje që nga ora 03:00 e së martës. “Nuk e di se si ka ndodhur rasti. Që nga ora 3 e mëngjesit jam në vend të ngjarjes, për të marrë informacione nga institucionet bullgare, por deri më tani ende nuk dihen shkaqet”, tha ai.
