Ushtria e Kongos po merr ilegalisht armë nga Shqipëria, pa njoftuar Organizatën e Kombeve të Bashkuara, ashtu sikundër është vendosur në një rezolutë të nënshkruar në vitin 2004.
Lajmi në fjalë është konfirmuar nga mediat franceze, të cilat e kanë siguruar edhe raportin në Këshillin e Sigurimit të OKB-së. Disa nga armët kanë rënë në duart e grupeve të armatosura, që veprojnë në lindje të vendit.
Ndonëse Kongo nuk ka nënshkruar asnjë embargo armësh, trajnimi i ushtrisë ose dërgimi i armëve duhej bërë me dije për OKB-në, duke marrë parasysh se në raportin e publikuar tregohet se atje janë dërguar sasi të konsiderueshme municionesh, pajisjesh dhe automjetesh luftarake për ushtrime. Vendet “bamirëse” nuk janë kursyer që të dërgojnë edhe helikopterë civilë, të cilët në fakt përdoren për sulme nga ajri.
“Gjatë dekadës së fundit, një pjesë e madhe e logjistikës ajrore të FARDC (ushtarake) mbështetej në një flotë të transportit të posaçëm për civilët, por që përdorej për luftë. Autoritetet vendase veprojnë në kundërshtim me normat dhe rregullat e aviacionit civil ndërkombëtar dhe kombëtar. Disa nga materialet e dorëzuara, u transferuan më vonë te grupet e armatosura në lindje”, thuhet në raport.
