“Do të ofrojmë ndihmën tonë ndaj politikës që të zbatojë rekomandimet e OSBE-ODIHR për zgjedhjet e 25 Prillit.” Ky ka qenë reagimi i Ambasadorit të OSBE-së në Tiranë, Vincenzo del Monaco, lidhur me zgjedhjet e 25 Prillit. Ai ka veçuar bashkëpunimin me KQZ-në gjatë zgjedhjeve dhe ka deklaruar se po pret zbardhjen e rekomandimeve. “Ne si prezenca e OSBE-së në Shqipëri kemi pasur bashkëpunim shumë të mirë përpara zgjedhjeve edhe me partitë politike edhe me KQZ-në dhe mendoj që kjo është diçka inkurajuese. Me të dalë raporti përfundimtar i ODHIR-it prezenca e OSBE në Shqipëri është e gatshme për te ndihmuar për zbatimin e rekomandimeve më potenciale që ai raport do të ketë. Dhe këtë po jua them publikisht që tani që para se të dalë raporti dhe është një fakt që ne e dimë edhe KQZ. Do qëndrojmë gati nëse do na kërkohet të ndihmojmë në zbatimin e rekomandimeve. Këto janë çështje me rëndësi për të pasur një diskutim të vërtetë nga parlamenti i ri që do përfaqësohet nga forcat politike të reja sipas formatit të ri në shtator”, tha ambasadori Del Monaco.
Ndërkohë, Ambasadori I OSBE-së në Tiranë, Del Monaco, ka komentuar dhe deklaratat e kreut të PD-së, Lulzim Basha duke thënë se i dëgjon me vëmendje të gjitha deklaratat. Ai është shprehur se së shpejti do të ketë një takim me kreun e opozitës, ku pritet të diskutohet edhe pretendimi i PD-së lidhur me parregullsinë në zgjedhjet e 25 Prillit. “Presim raportin përfundimtar të OSBE-së. Raportet dalin tre muaj pas zgjedhjeve. Së shpjeti do zhvilloj një takim me kryetarin e Partisë Demokratike Lulzim Basha, do diskutoj me të,”- tha ambasadori.
