Zëdhënësi i presidentit, Tedi Blushi, ka reaguar pas deklaratës së bërë nga kreu i grupit parlamentar të PS-së, Taulant Balla, pas miratimit të raportit nga Komisioni i Venecias.
Përmes një postimi në Facebook, Blushi komentoi edhe propozimet që Balla hodhi pas miratimit të raportit, duke i cilësuar ato si për të qeshur.
Sipas Blushit, çështja e presidentit Meta është mjaft e qartë dhe se ai nuk ka kryer asnjë shkelje të Kushtetutës.
Reagimi i Tedi Blushit
Propozimet e Tao Tao-s gajasën sot të madh e të vogël në Komisionin e Venecias.
Hëngri një dajak të fortë, por mënd nuk zuri, dhe vazhdon propogandën bajate me titra të porositura.
I kujtoj Tao Tao-s “hurin” që mori nga raporteri i çështjes për rrjedhjen në media të Draf-Opinionit, për keqpërdorim politik. Dhe nëse nuk është ftilluar akoma, ai dhe delegacioni që e shoqëron, le të bëjnë një vizitë në Bienalen e Venecias, se ndoshta u bie stresi.
Sa për Presidentin, çështja është e qartë si kristali: ZERO SHKELJE TË KUSHTETUTËS.
Tani të gjithë të bashkuar të mbështesim kuqezinjtë në sfidën e mbrëmjes.
