Ish-ministri, Ylli Manjani, shprehet se raporti i ODIHR-it ka konfirmuar se 30 qershori nuk ra sepse ai nuk ishte.
Përmes një statusi në Facebook, Manjani deklaron se 30 qershori regjistrohet në kalendarin politik, si dita kur qeveria e Ramës vendosi të rrëmbejë me dhunë pushtetin vendor.
“Vetëm tek ky kalendar mund të gjendet ky 30 qershor, si ditë e turpit e njollës edhe më të zezë politike se ajo e zgjedhjeve parlamentare të vitit 1996. Prandaj, cilido që thotë se “ra 30 qershori”, në fakt i ka dhënë kësaj date një vlerë zyrtare që nuk e ka. Nuk e ka pasur as para raportit të ODIHR”, shkruan Manjani.
Postimi i plotë:
30 qershori nuk ra, sepse nuk ishte. ODIHR vetëm sa e konfirmoi këtë gjë.
Nuk ishte një datë zyrtare për zgjedhje. Si e tillë, nuk regjistrohet dot në asnjë kalendar zyrtar të shtetit si datë zgjedhjesh.
30 qershori 2019 regjistrohet vetëm në kalendarin politik si dita kur qeveria moniste vendosi të rrëmbejë me dhunë pushtetin vendor. Vendosi të kthejë bashkitë në Komitete Ekzekutive moniste.
Vetëm tek ky kalendar mund të gjendet ky 30 qershor, si ditë e turpit e njollës edhe më të zezë politike se ajo e zgjedhjeve parlamentare të vitit 1996.
Prandaj, cilido që thotë se “ra 30 qershori”, në fakt i ka dhënë kësaj date një vlerë zyrtare që nuk e ka. Nuk e ka pasur as para raportit të ODIHR.
