Aksidentet rrugore janë rritur me 32.9 për qind në raport me 6 mujorin e njëjtë të një viti më parë. Instituti i Statistikave, (INSTAT) ka shpjeguar se rritja e numrit të aksidenteve lidhet edhe me masat kufizuese të një viti më parë, ku qarkullimi ka qenë shumë më i kufizuar.
“Në muajin qershor 2021 numërohen 124 aksidente rrugore nga 115 aksidente të ndodhura në muajin qershor 2020, duke u rritur me 7,8 %, krahasuar me të njëjtën periudhë të vitit të kaluar. Për shkak të masave kufizuese në qarkullim në qershor 2020, krahasimi i numrit të aksidenteve paraqitet me një rritje më të lartë gjatë këtij muaji. Për rrjedhojë edhe krahasimi gjashtëmujor paraqitet me një rritje prej 32,9 %, ku numërohen 671 aksidente rrugore nga 505 aksidente të ndodhura në gjashtëmujorin e parë të vitit 2020.
Në muajin qershor 2021, numri i të aksidentuarve (të vrarë dhe të plagosur) është 161 persona nga 143 që ishte në të njëjtën muaj të një viti më parë. Në gjashtëmujorin e parë të vitit 2021, numri i të aksidentuarve është 875 persona nga 656 persona në gjashtëmujorin e parë të vitit 2020. Në muajin qershor 2021, numri i të vdekurve nga aksidentet rrugore është 15 persona nga 16 persona të vdekur në qershor 2020. Në gjashtëmujorin e parë të 2021, numri i të vdekurve nga aksidentet rrugore është 105 persona nga 74 persona të vdekur në të njëjtën periudhë të një viti më parë”, ka shpjeguar INSTAT.
Ndërkaq, i njëjti raport ka nënvizuar se, shkak në shumicën e rasteve për aksidentet janë bërë sjelljet e drejtuesve të mjeteve. Sipas raportit, grupi me më shumë aksidente është ai i moshave 25-34 vjeç.
“Në muajin qershor 2021, aksidentet rrugore, në 86.3 % të rasteve, kanë ndodhur si pasojë e sjelljes së drejtuesit të mjetit. Numri më i lartë i aksidenteve në këtë periudhë është kryer nga grup-mosha 25–34 vjeç, duke zënë 29.0 % të numrit të aksidenteve gjithsej. Aksidentet në këtë grup-moshë janë ulur me 14.3 %, krahasuar me të njëjtën periudhë të një viti më parë. Në gjashtëmujorin e parë të vitit 2021, aksidentet rrugore, në 17.6 % të rasteve, kanë ndodhur si pasojë e sjelljes së këmbësorit. Gjatë kësaj periudhe, numri i aksidenteve sipas sjelljes së këmbësorit është rritur 45.7 %, krahasuar me një vit më parë”, thuhet në publikimin e INSTAT.
