Departamenti Amerikan i Shtetit ka publikuar “Raportin e Vendeve për Terrorizmin”. Në raport, Shqipëria përgëzohet për luftën ndaj terrorizmit dhe ekstremizmit të dhunshëm.
Sipas DASH, në muajin dhjetor qeveria shqiptare ka dëbuar ambasadorin e Iranit në Tiranë, si dhe një person tjetër, pasi po sponsorizonin kryerjen e një sulmi terrorist në vendin tonë.
“Në dhjetor, Shqipëria dëboi dy zyrtarë iranianë, përfshirë ambasadorin në Shqipëri në përgjigje të një komploti të sponsorizuar nga Irani për të kryer një sulm terrorist në Shqipëri”, thuhet në raport.
Po ashtu, Dash ndalet edhe tek Reforma në Drejtësi dhe ngritja e dy organeve të reja të saj, SPAK dhe BKH.
“Reforma kushtetuese dhe ligjore për gjyqësorin janë duke u zhvilluar, duke filluar nga verifikimi i 800 gjyqtarëve dhe prokurorëve të Shqipërisë për korrupsion, aftësitë dhe lidhjet me krimin e organizuar. Pritet që të ngrihet SPAK dhe Byroja Kombëtare e Hetimit”, shkruhet në raportin e shpërndarë nga Ambasada e SHBA-së në Tiranë.
