Bledi Çuçi, i cili mban detyrën e Ministrit të Bujqësisë, do të vendoset në krye të Ministrisë së Brendshme, ndërsa në vend të tij do të vendoset Milva Ikonomi.
Bledi Çuçi do të jetë pasuesi i Sandër Lleshajt, në postin e Ministrit të Brendshëm në Shqipëri. Lajmin e ka dhënë vetë kryeministri Edi Rama në një postim në Twitter. Postin e Çuçit, si ministër Bujqësie do ta marrë Milva Ikonomi. Emrat i janë dërguar presidentit Ilir Meta për dekretim.
Sot do të dërgoj për dekretim nga Presidenti, Bledi Çuçin si ministër të brendshëm dhe Milva Ikonomin si ministre bujqësie; dy bashkëpunëtorë të përkushtuar në çdo detyrë që kanë kryer këto vite, me integritet, profesionalizëm dhe kulturë qytetare e politike të padyshimtë.
— Edi Rama (@ediramaal) December 16, 2020
Ministri i Brendshëm në detyrë, Sandër Lleshaj, dha dorëheqjen pak ditë më parë, pas vrasjes së të riut Klodian Rasha, i cili u qëllua për vdekje nga efektivi i policisë, Nevaldo Hajdaraj.
