“Ecuria është goxha pozitive”. Kështu u shpreh kryeministri Rama, ndërsa nuk nguroi që të shprehte falenderimet ndaj të gjithë shqiptarëve të cilët po sakrifikojnë duke u izoluar. “Të pabindurit janë pak, por janë minë me sahat”, shtoi më tej Rama, duke sjellë në fokus rastin e pak qytetarëve të pandërgjegjshëm. Ata janë nxitës të rrëmujës!
Kreu i qeverisë Edi Rama tha se ditë e natë po merren me çështjen e COVID-19, ndërsa paralajmëroi se kufijtë janë të mbyllur për të mbrojtur çdo shqiptar.
Ai e cilësoi si një papërgjegjshmëri për këdo që merr rrugën për të ardhur në Shqipëri. Por Rama tha se ka menduar edhe për këtë çështje. Ai deklaroi se kush do të hyjë në vendin tonë, do të karantinohet në hotel me shpenzimet e veta. Rama ka shigjetuar edhe ish-kryeministrin Berisha, ku sipas tij, synon katastrofën.
“Në Kapshticë kemi 19 makina të personave që janë banorë rezidentë që nuk kanë urgjencë, por kërkojnë të hynë për të takuar familjen. Kur bën patriotin, synon që të nxisë katastrofën.
Berisha ka shumë vite që kërkon të shkatërrojë Shqipërinë. Ata si Saliu i bien këtij avazi që është i patolerueshëm në këtë kohë. Është e patolerueshme që të nxiten njerëzit për të ardhur këtu. Kufijtë janë të mbyllur.
Ne kemi vendosur që brenda 24 orëve të ardhshme të hyjmë në një proces të ndërmjetëm. Kush do të vijojë me dokumente rezidente të vendeve të tjera, s’do të hyjë dot. Të tjerët do të karantinohen në hotele me shpenzimet e tyre. 14 ditë në hotel në dhomë mbyllur do të marrë ushqim me çmim fiks”.
