Kreu i Qeverisë Edi Rama përmes një video-mesazhi të publikuar në Facebook, dha disa detaje mbi përmbajtjen e paketës ekonomike, që pritet të bëhet publike brenda datës 15 Prill.
“Për berberët që janë mbyllur dhe ata do të marrin pagën përkatëse, që po e studiojmë. Do të jetë pjesë e paketës së zgjeruar brenda 15 Prillit. Linjat ajrore do të hapen kur situata të ketë kaluar.
Kam marrë ankesa nga biznese të vogla, si rropaqepësi, servis makinash, me ligjin në fuqi është i hapur, por me zakonin në fuqi është i mbyllur, pasi nuk ka fluksin që lëviznin. Po ashtu, profesionet e tjera, hidraulikë, agjenci turistike, dizajner, që punojnë me printime, e të tjerë, taksistë, janë biznes i vogël. Këta dhe ndonjë kategori tjetër, do të jenë pjesë e zgjerimit të paketës së mbështetjes. Janë biznese të vogla, të mbyllura ‘de facto’, si rezultat i luftës. Ata që janë punonjës për linjat e transportit dhe që praktikisht janë në shtëpi se nuk ka transport urban e ndër urban, do jenë pjesë e paketës së zgjeruar”, sqaroi Rama.
Ky i fundit u bëri thirrje qytetarëve shqiptarë që të bëjnë pak durim, në këtë periudhë ku vendi është prekur nga koronavirusi:
“Ju jeni jetimë lufte dhe si të tillë, ne nuk mund t’ju lëmë vetëm. Kini vetëm pak durim. Nuk do t’ju lëmë vetëm. Nuk do iu themi vrisni veten! Shyqyr ka rënë ajo ‘bu bu bu’ po vdesim për bukë. Nuk ka asnjë rast vdekje për bukë që nga koha e Skënderbeut. Me aq sa kemi mundësi, nuk do iu lëmë vetëm. Por mos na kërkoni përtej asaj që kemi mundësi sepse biem pastaj në një gropë dhe bëhemi gazi i botës”.
