Kryeministri Edi Rama thotë se mandati i tretë i duhet pasi ka ende shumë punë për të bërë. Ai ka publikuar disa foto nga Poliklinika e Krujës, me të cilat tregon si ishte dhe si po bëhet sot.
Këto foto, sipas kreut të qeverisë, tregojnë se gjendjen e mjeruar në të cilën ishte poliklinika para 7 vitesh dhe jo para 70 vitesh, duke thumbuar kështu edhe kundërshtarët politikë.
Rama shprehet se askush nuk e mbaron dot punën transformuese të shëndetësisë përveç tij.
”Ja si ishte edhe Poliklinika e Krujës deri para 7 jo 70 vjetësh dhe si po bëhet sot, e le ta shohin edhe këtë ata që vazhdojnë thonë “s’ka ndryshuar asgjë” ose më keq akoma, “s’ka më keq se janë bërë spitalet”!
Unë jam i pari që them ka ende shumë akoma për të ndryshuar më tej, prandaj duhet Mandati i Tretë, por ama kush thotë se nuk ka ndryshuar si nata me ditën gjendja e spitaleve, ose ka humbur kujtesën ose është krejt i verbuar nga mllefi politik!
Sidoqoftë një gjë është e sigurtë: Askush nuk e mbaron dot punën transformuese të shëndetësisë përveç nesh, sepse kjo është një luftë që do vizion, pasion, vullnet dhe durim të madh, e këto o i ke o s’i ke.”, shkruan Rama në rrjetin social, Facebook.
