Takimi i kryeministrit Edi Rama dhe presidentit të vendit, Ilir Meta, ka zgjatur vetëm 10 minuta. Rama dhe Meta janë dakordësuar për datën e zgjedhjeve. Dy palët kanë rënë dakord për çdo datë zgjedhjesh të vlefshme në periudhën zgjedhore 15 prill-15 maj, me përjashtim të datës 2 maj. Kjo për shkak të kremtimit të Festës së Pashkëve.
Më herët PS kishte propozuar datën 9 maj si datë për zhvillimin e zgjedhjeve parlamentare. Duket se këmbëngulja e opozitës për 18 prillin, ka bërë që kryeministri të ndryshojë mendje. Kreu i qeverisë mbërriti në Presidencë i shoqëruar nga Taulant Balla. Meta ka transmetuar takimin me Ramën live në Facebook, ku në fund e ka ftuar nëse dëshironte të pinte kafe apo çaj.
“Ju thërrita për të zhvilluar konsultimet për datën e zgjedhjeve, brenda afatit që krijon Kushtetuta, me qëllim që të kemi një proces sa më gjithëpërfshirës dhe për të respektuar çdo ndjeshmëri. Në këtë drejtim do të isha i interesuar të dëgjoja dhe opinion tuaj si përfaqësues të PS dhe mazhorancës”, tha Meta.
