Kryeministri Rama ka dhënë detaje sot në lidhje me procesin e vaksinimit. Teksa ndodhet në stadiumin Air Albania, bashkë me ministren e Shëndetësisë, Ogerta Manastirliu, kryeministri Edi Rama iu përgjigj pyetjes së gazetarëve, në lidhje me vaksinën anti-Covid.
Pyetjes së një gazetareje lidhur me çmimin e vaksinës dhe mënyrës si do të transportohet, Rama iu përgjigj me ironi, duke thënë se do transportohet me “kuaj e mushka”. Ai tha se vaksina ka një çmim standart për të gjithë vendet që janë të interesuara ta marrin. Rama shtoi më tej se e ka të ndaluar për të zbuluar çmimin, dhe se nuk mund të negociohet për të patur ulje në çmimin e vaksinës ndaj pandemisë.
“Ka çmim unik për të gjitha vendet, nuk negocion me asnjë vend, është çmim konfidencial. Për një periudhë 2-3 mujore, situata do të qetësohet. Më shumë nuk them dot.
Transportin do e bëjmë me kuaj, me mushka, me ça do të jetë. Keni parë ndonjë kompani që shet dhe të merr përsipër transportin? Ça janë këto pyetje!”, tha Rama.
